Pwyntiau i'w cysidro pan yn dewis eich stafell molchi gan Tu Mewn

Dewisiadau Bath

   •   Y maint a’r siâp a fyddai’n gweddu eich ystafell ymolchi orau.
   •   Pa ddeunydd:
        •   Mae acrylig yn cynnig hyblygrwydd ar gyfer sawl siâp a chynllun.
        •   Mae dur ar gyfer baddonau petryal yn gryf ac yn gwisgo’n dda.
        •   Cryfder haearn bwrw ar gyfer baddonau moethus sy’n sefyll ar eu pennau eu hunain a
             baddonau petryal.
        •   Gellid gosod system sba / trobwll mewn sawl baddon acrylig.

Dewisiadau Cawod

   •   Cabined hunangynhaliol, sy’n sefyll ar ei ben ei hun, efo opsiynau hydro-dylino a sawna.
   •   Cawod efo drws a phanel gwydr.
   •   Falf neu golofn hydro-dylino dros faddon.
   •   Cymysgwyr a reolir â llaw neu â thermostat.

Dewis 'Suite' Stafell Molchi

   •   Ceir basnau o bob math a maint ar gyfer gwahanol ofynion. Cewch ddewis o fasnau
        pedestal, basnau lled-bedestal, basnau harddwch, basnau mewn arwyneb gwaith, basnau
        cul modern, a basnau ystafell gotiau.
   •   Mae tri phrif math o setiau toiled ar gael:
        •   Mae setiau ar-y-llawr ar gael fel set clos gypledig (lle mae’r pan a’r sistern efo’i gilydd)
             neu setiau lefel-isel (lle ceir pibell fer yn cysylltu’r pan a’r sistern ynghyd).
        •   Setiau cefn-wrth-wal, lle mae’r sistern wedi ei guddio y tu ôl i wal ffug, sy’n golygu mai
             dim ond y pan sy’n y golwg. Mae’r pan ar y llawr, ac mae’r holl bibelli wedi eu cau i
             mewn, sy’n golygu ei fod yn hawdd ei lanhau. Dim ond rhai setiau sy’n cynnig yr opsiwn
             cefn-wrth wal.
        •   Mae gan setiau ar-y-wal sistern gudd hefyd, ond mae’r pan wedi ei osod ar blatfform
             uwch y llawr, sy’n ei gwneud hi’n arbennig o hawdd glanhau o dan ac o amgylch y pan.
   •   Mae bidets sefyll-ar-y-llawr, cefn-wrth-wal neu ar-y-wal i’w cael, i gyd-fynd â pha bynnag
        doiled a ddewiswyd gennych. Os nad oes llawer o le gennych chi, beth am set doiled
        Multiclin sy’n troi eich toiled yn bidet hefyd! Cofiwch wneud yn siwr bod y Multiclin yn
        addas ar gyfer y set tŷ bach a ddewiswyd gennych.

Mae sawl amrywiad a steil i’w cael yn newis helaeth Tu Mewn.

Ar gyfer basnau:
   •   Mae tapiau piler yn ddau dap ar wahân, un poeth ac un oer.
   •   Mae tapiau cymysg yn dod o un ffynhonnell efo dwy droell ar wahân i weithio’r tapiau - un
        poeth ac un oer.
   •   Mae tapiau cymysg un lifer yn dod o un ffynhonnell, efo un lifer yn rheoli llif y dwr a’r
        tymheredd.
   •   Mae tapiau cymysg electronig yn dod o un ffynhonnell, ac mae rheolwr tymheredd ar ochr y
        ffynhonnell honno ac mae’r dwr yn llifo pan dorrir y pelydr isgoch (mae'n rhedeg efo batri
        neu efo trydan).